Martes, Abril 21, 2020

Hindi ko ipagdadamot ang aking mga tula

Hindi ko ipagdadamot ang aking mga tula

hindi ko ipagdadamot ang aking mga tula
sa nais magbasa nito o bigkasin sa madla
at kung kailangan, sila pa'y aking igagawa
ng tula, basta magmungkahi lang sila ng paksa

gayunman, salamat din sa mga di nagbabasa
dahil ang mas nais nilang basahin ay nobela
baka tingin nila ginagawa ko'y propaganda
gayong tula'y pagbibigay ng pag-asa sa masa

lumaki na akong nakikibaka't di maramot
pag may pera'y galante, pag walang pera'y kuripot
ngunit aking mga katha'y di ko ipagdadamot
ito'y paraan ko ng pagsisilbing walang imbot

sana'y malathala ang mga ito sa magasin
sa mga dyaryo, libro, o iba pang babasahin
kung mamatay na ako'y daigdig na ang aangkin
nitong mga tulang aking kinatha't di na akin

- gregbituinjr.

Walang komento:

Mag-post ng isang Komento

Pahimakas kay kasamang Rod

PAHIMAKAS KAY KASAMANG ROD (binigkas ng makatang gala sa pugay-parangal) sa iyo, kasama, pagpupugay sa pagpapatibay mo ng hanay sa adhikaing...