wala nang toyo kaya nagtungong tindahan
nang madapa kaya ngayong nag-aalangan
pumuntang banyo't sugat muna'y hinugasan
paika-ika't sinisisi'y katangahan
pinanonood kasi'y langgam na nagbuno
gayong tuliro sa gutom na di maglaho
ah, dapat nang labhan ang medyas na mabaho
saka na atupagin ang dinidibuho
tingin na sa sarili'y papepi o lampa
na kamay ay laging nasa loob ng bulsa
katawang payat, mahina't namumutla pa
di kasi kumakain sa oras tuwina
kanyang hinimas-himas ang duguang tuhod
kung di agad tumayo'y baka napilantod
aral sa kanya: huwag laging nakatanghod
o lumilipad ang isip na parang tuod
- gregoriovbituinjr.
08.18.2021
Walang komento:
Mag-post ng isang Komento