WIKA
ang bawat pagtula'y pagtataguyod ng salita
marahil isa iyan sa misyong di sinasadya
ang di raw marunong magmahal sa sariling wika
ay katulad nga ba ng hayop at malansang isda
aba'y anong sakit naman lalo't di nila alam
nagustuhan kong tumula dahil ito'y mainam
sa kalusugan ng katawan, diwa't pakiramdam
tila ba anumang sakit ay agad napaparam
anumang danas ko'y sa mga salita naukit
pagkat sa aking puso't diwa'y laging nabibitbit
kaya mga kataga'y sa saknong ko sinasabit
sa umaga, sa tanghali, o sa gabing pusikit
kaya ang Buwan ng Wika'y madalas paghandaan
kahit wala akong partisipasyon sa anumang
aktibidad maliban sa pagtulang aabangan
kung mayroon man at panonoorin ang bigkasan
Enero pa lang naman, kaytagal pa ng Agosto
Araw ng Tula'y pangdalawampu't isa ng Marso
patuloy lang sa pagkatha kaming panitikero
habang may malayang wikang sinasalita tayo
- gregoriovbituinjr.
01.12.2022
* litratong kuha ng makatang gala sa tapat ng isang pamantasan sa La Trinidad, Benguet
Walang komento:
Mag-post ng isang Komento