ayokong sayangin ang panahon sa pagtunganga
kung wala namang naninilay o tinitingala
maliban kung may lumitaw na magandang diwata
o kaya'y Musa ng Panitik kaya napapatda
wala nang pumansin sa akin mula magkasakit
masalubong man ako, mata nila'y tila pikit
parang ako'y multo o tila kanilang kagalit;
sa panahong ito, magkasakit nga'y anong lupit
subalit heto, sa pagkatha'y nagpatuloy pa rin
kung may mabentang tula, may pambili ng pagkain
nagsisipag kumatha bakasakaling palarin
ang makatang pulos luha, na katha'y didibdibin
minsan, di ko na makuhang tumingala sa langit
baka mapala'y hagupit ng sigwang nagngangalit
at yaong mata ng bagyo'y didilat at pipikit
di malaman anong mangyayari sa ilang saglit
banggitin mo ang pangalan ko sa mga Bathala
habang pinarurusahan itong abang makata
dahil di ko mapuri ang pagtudla sa kawawa
na para sa kanila'y laruan lang na manika
patuloy sa pagkuyom ang matigas kong kamao
na tutol sa pagyurak sa karapatang pantao
habang nagninilay at nakatambay lang sa kanto
hinihintay ang diwang sisirit sa aking ulo
- gregoriovbituinjr.
04.05.2022
Walang komento:
Mag-post ng isang Komento