pinatay ko ang ilaw sa silid
nang gamugamo'y nangaglipana
kaya di na sa atin nalingid
na ulang matindi'y daratal na
ganoon sila, aking napansin
binuksan ko ang ilaw sa banyo
kawan silang nagsisuguran din
at bombilya'y pinutakting todo
lumabas muna ako ng bahay
kayrami rin sa ilaw ng poste
tila nagpipyesta silang tunay
sa nadamang laya ngayong gabi
at maya-maya lang ay umulan
naisipan kong agad umuwi
ang bubong ay nagkakalansingan
nagtungong banyo upang umihi
kawang gamugamong naroon
animo'y naglanguyan sa timba
o nangalunod ang mga iyon
anong kanilang ibinabadya
- gregoriovbituinjr.
05.27.2022
Walang komento:
Mag-post ng isang Komento