YIBOK AT YAMAS
nakita ko'y dalawang di pamilyar na salita
na animo'y karaniwan lang na mga kataga
YIBOK sa kakataying hayop ay pagpapataba
YAMAS ay bagaso, sapal, natira sa pagpiga
nasa pahalang ang salitang kapwa natagpuan
habang nagsasagot ng sa dyaryo'y palaisipan
U.P. Diksiyonaryong Filipino pa'y tiningnan
upang mabatid lang kung tama ba ang kahulugan
sa pahalang, numero trenta, tanong ay bagaso
alam ko'y sapal iyon kaya sapal ang sagot ko
nang sinagutan ang pababa, nag-iba na ito
lumabas na yamas ang sagot, napatango ako
kaya nais kong ibahagi ang YIBOK at YAMAS
pagkat bago sa akin ang salitang natalastas
salamat sa krosword at napapatulang madalas
nagagawan ng katha yaong salitang nawatas
- gregoriovbituinjr.
04.24.2023
* palaisipan mula sa dyaryong Pilipino Star Ngayon, Abril 22, 2023, pahina 10
* kahulugan, mula sa UP Diksiyonaryong Filipino, pahina 1343 at 1345
Walang komento:
Mag-post ng isang Komento