Huwebes, Abril 18, 2024

Huling gabi ng lamay

HULING GABI NG LAMAY

marami pa ring kamag-anakan
ang naroroong nagdaratingan
tulad ng tiyahi't magpipinsan
iba'y kaylayong pinanggalingan

di makatulog sa huling gabi
kaya nagbantay na lamang dine
sa pagninilay ipinipirmi
ang paksang itutula ko sabi

ang umalis sa sariling bayan
ay bumalik din sa pinagmulan
ang ipinanganak sa Balayan
sa bayang iyon uuwi naman

naritong pulos kape't salabat
nang sa huling lamay ay magluwat
patuloy na nagtutugma't sukat
buong araw tiyak ako'y puyat

- gregoriovbituinjr.
04.18.2024

Walang komento:

Mag-post ng isang Komento

7M apektado sa masamang serbisyo sa tubig

7M APEKTADO SA MASAMANG SERBISYO SA TUBIG tinumbok na ng balita ang masamang serbisyo sa patubig, na ari ng isang mayamang angkan sa kanila ...