PANANGHALIAN
sardinas na'y muli kong ginisa
at agad inihain sa mesa
pagkat gutom na itong nadama
di sapat ang kain sa umaga
sa gutom ay di na nakatiis
ang tiyan ko't katawang kaynipis
buti't may nabili na si misis
na delatang sa gutom papalis
kanina'y nakapagsaing na rin
kaya ulam lang ang lulutuin
matapos ang mahabang sulatin
ang gutom na'y dumalaw sa akin
kain agad nang ito'y maluto
puso ko'y sumigla sa pagsuyo
at mata ko'y di na lumalabo
gutom na'y unti-unting naglaho
- gregoriovbituinjr.
08.02.2024
Walang komento:
Mag-post ng isang Komento