PRAYORIDAD
kayrami kong prayoridad na iniisip
na kinakayang dalhin ang anumang bitbit
pangalagaan ang misis na nagkasakit
pagbabasa ng dyaryo't librong nahahagip
pagsusulat sa Taliba ng Maralita
publikasyon ng KPML, nalathala
roon ang mga isyu at laban ng dukha
pati isyu't tindig ng uring manggagawa
talagang wala nang panahon sa inuman
mayroon sa rali, inuuna'y tahanan
gawaing bahay, luto, laba, kalinisan
pagkatha ng nobela'y pinaghahandaan
katha ng katha ng sanaysay, tula't kwento
pahinga'y sudoku't pagbabasa ng libro
sa ganyan umiinog ang munti kong mundo
sa pamilya, sa Taliba't kakathain ko
- gregoriovbituinjr.
01.17.2025
* KPML - Kongreso ng Pagkakaisa ng Maralitang Lungsod
Walang komento:
Mag-post ng isang Komento