PAGKAWALÂ
ngayong nawalan na / ako ng asawa
sinong mag-uulat / na ako'y nawalâ
dinukot ninuman / dahil aktibista
ika ni Gat Andres, / walâ na ngâ, walâ
tuloy pa rin ako / sa bawat pagkilos
nang masa'y mamulat / sa prinsipyong yakap
upang manggagawà / at kapwa hikahos
ay magsikilos na't / makulong ang korap
mahahalata mo / pag winalâ ako
pag tulang tulay ko'y / di na natunghayan
sa umaga't gabi / ng mga katoto
oo, tanging tulâ / ang palatandaan
may habeas corpus / nang ako'y mahanap
o kung di na buhay, / makita ang bangkay
bigyan ng marangal / na libing, pangarap
kong tulang kinatha'y / inyo pang matunghay
- gregoriovbituinjr.
10.30.2025
Walang komento:
Mag-post ng isang Komento