Patama sa sarili

PATAMA SA SARILI

minsan, kasalanang magising ng alas-siyete

ng umaga habang iba'y handa nang bumiyahe

patungo sa trabaho o gumawa ng diskarte

upang pamilya'y di magutom, agad sumisige

minsan, kasalanan ding magising ng alas-sais

putok na ang araw, nakahilata pa sa banig

habang abang magsasaka'y naroon na sa bukid

habang si Inang, may pang-almusal na sa bulilit

nasa lungsod man, maganda pa ring madaling araw

ay bumangon na, bago pa ang araw ay lumitaw

anong sarap gumising sa alas-singkong maginaw

painat-inat, maya-maya'y hihigop ng sabaw

na mainit, sa mga gagawin ay maghahanda

upang di abutin ng tabsing sa dagat o sigwa

mahirap nang patulog-tulog sa pansitan, ngawa

kung babangong tirik na ang araw, tamad bang sadya?

- gregoriovbituinjr.

03.20.2022

Upuan

UPUAN

napaupo ako sa upuan
napahiga ako sa higaan
napatayo ako sa tayuan
o kaya naman ay sa Tayuman

madalas nakakaupo sa dyip
lalo't barya lang ang halukipkip
madalas din doong managinip
kasama ang mutyang nasa isip

pinta sa upuan ay masdan mo
obra maestrang kayhusay, ano?
di basta matibag ng delubyo
pintang tila likha ng maestro

una ang kabayo sa kalesa
di ba? kaya di kalesa muna
dapat unawa itong talaga
lalo sa paggawa ng taktika

uupo tayo sa mga pulong
ng may kahandaan ng marunong
upang di tayo basta uurong
kung alam nating kayang sumulong

- gregoriovbituinjr.
03.19.2022

Minsan

MINSAN

minsan, ūkailangan ding mamasyal
sa panahong nakatitigagal
maglakad-lakad hanggang magpagal
o mag-jogging kahit hinihingal

minsan, nakatitig sa kisame
nag-iisip ng mga diskarte
upang malabanan ang salbahe
o kaya'y mga trapong buwitre

minsan, matutulog ka ng dilat
at bigla kang maalimpungat
masabing sana'y nakapagmulat
ng kapwa dukhang nakamulagat

minsan, pag dama'y walang magawa
nagninilay ng mahaba-haba
doon sa langit nakatulala
makakakatha na maya-maya

tulad ng paminsan-minsang kaba
na anumang sigwa'y kinakaya
kaharap man ang banta ng bala
nang kamtin ang asam na hustisya

- gregoriovbituinjr.
03.19.2022

Istiker sa motor

ISTIKER SA MOTOR

nakakatuwa ngang talaga

ang motorsiklo ng kasama

nagbigay-pagpapahalaga

sa mga pambáto ng masa

may istiker ni Ka Leody

na si Ka Walden ang katabi

P.L.M. partylist, malaki

na ang numero ay wan-tu-tri

kung mabasa ng masa ito

habang dala ang motorsiklo

malalamang lider-obrero'y

kumakandidatong Pangulo

sa kasama, pasasalamat

ikaw ay nakapagmumulat

bagamat laban ay mabigat

ay may nagagawa kang sukat

sa madla'y naipaparating

ang kandidatong magigiting

sina Ka Leody't Ka Walden

sana'y maipanalo natin

- gregoriovbituinjr.

03.18.2022

Upos

UPOS

napakasimple lamang ng paskil

ngunit, datapwat, nakagigigil

na pinagtatapunan ng sutil

ng upos ang halaman, suwail

huwag naman ninyong pagtapunan

ng upos ang nariyang halaman

di naman iyan dapat paglagyan

ng upos n'yo't gawing basurahan

paalala lang sa hitit-buga

mga upos n'yo'y ibulsa muna

na balat ng kendi ang kagaya

pakiusap lang itong talaga

ashtray o titisan ay ilagay

mas mabuti ang ganitong pakay

pag may titisan ay naninilay

upos ay doon lamang ilagay

nagpapasalamat kaming taos

kung may titisang naisaayos

kung doon itatapon ang upos

may nagawa tayong tama't lubos

- gregoriovbituinjr.

03.18.2022

Save Diliman Creek

SAVE DILIMAN CREEK

pinta sa pader: Save Diliman Creek

alamin natin ang natititik

sapa bang ito'y hitik na hitik

sa dumi, upos, basura't plastik

nadaanan ko lang naman ito

at agad kinunan ng litrato

upang maipaalam sa tao

na may problema palang ganito

paalala na iyon sa bayan

panawagang dapat lang pakinggan

tungong "Malinis na Katubigan"

pati "Luntiang Kapaligiran"

pakinggan mo ang kanilang hibik

anong gagawin sa Diliman Creek?

tanggalan na ng basura't plastik!

ang sapang ito'y sagiping lintik

"Save Diliman Creek" ay ating dinggin

sapagkat kaytinding suliranin

magsama-samang ito'y sagipin

dapat linisin, ang wasto'y gawin

sana naman ay dinggin ng madla

maging ng pamahalaan kaya

ang ganitong problema sa bansa

upang masolusyunan ng tama

- gregoriovbituinjr.

03.18.2022

Victory sign

VICTORY SIGN

naka-Victory sign na siya

sa loob ng sinakyan niya

magtatagumpay ba talaga

oo, at ating kinakaya

basta tayo'y tuloy ang laban

kaya sa halalan tandaan

ngalang Ka Leody de Guzman

para Pangulo nitong bayan

sa pagka-Bise'y Walden Bello

Senador Luke Espiritu

Senador David D'Angelo

at Senador Roy Cabonegro

VIctory sign, magandang tanda

upang kumilos tayong sadya

sa tindig, prinsipyo't adhika

para sa dukha't manggagawa

pasalamat sa mamang iyon

sa pagbibigay-inspirasyon

dahil isang malaking hamon

ang tagumpay na nilalayon

mabuhay kayong kumikilos

upang maipanalong lubos

ang mga pambatong tatapos

sa sistemang kalunos-lunos

sistemang bulok ay baguhin

sistema ng trapo'y durugin

ang tatsulok ay baligtarin

kandidato'y papanalunin

ang misyon: Manggagawa Naman

asam: pagbabago sa bayan

mithi: makataong lipunan

pangulo: Leody de Guzman

- gregoriovbituinjr.

03.18.2022

* litratong kuha ng makatang gala noong Araw ng Kababaihan

Ngiti

NGITI

nakakahawa ang iyong ngiti

sasaya kahit may dalamhati

nakakaakit ang bawat ngiti

na sa puso ko'y nananatili

nakakahawa kahit pandemya

ang ngiti mong may buong pagsinta

ako'y napapangiting talaga

binabalik ang ngiting halina

sa ngiti, nabubuhay ang mundo

lumilinaw kahit ang malabo

pagsinta'y tiyak di maglalaho

kung may halina't ngiti sa puso

ngiti mo'y talulot ng bulaklak

lalo't dinggin ang iyong halakhak

pumapagaspas, puso'y may galak

at may ginagapas sa pinitak

sana pagngiti'y di ipagdamot

pangit ang laging nakasimangot

sa ngiti'y nawawala ang lungkot

pasensya sa aking mga hugot

- gregoriovbituinjr.

03.17.2022

Bedyetaryan

BEDYETARYAN

mahirap ding mag-vegetarian at budgetarian

kahit pinili mo iyon para sa kalusugan

bagamat dapat ka ring magtipid paminsan-minsan

pagkat kaymahal na rin ng gulay sa pamilihan

ayoko nang magkarne bagamat may isda pa rin

sinusubukan, ginagawa ay gulay at kanin

pagkat makakalikasan daw ito kung isipin

bagong estilo ng pamumuhay ba'y kakayanin

maliit ngang mineral water, kaymahal, tingnan mo

bente-singko pesos ang maliit na boteng ito

kumpara sa isang galon na nasa treynta-singko

aba'y iyan kasi ang batas ng kapitalismo

kaya magandang magtanim-tanim na rin ng gulay

upang may mapitas na kakainin balang araw

kung nasa lungsod ka'y sa paso magtanim ng gulay

kaysa nakatingala lang sa ilalim ng araw

bilang paghahanda kung pandemya'y muling humataw

- gregoriovbituinjr.

03.17.2022

Tulaan sa 3.21

Ilang araw na lang, World Poetry Day na! May tulaan sa darating na Marso 21, 2022.

Nais mo bang magbasa ng tula, o makibahagi sa pagdiriwang ng World Poetry Day? Tara, sa BMP opis sa Pasig, sa 03.21.2022, sa ikaapat ng hapon hanggang ikawalo ng gabi. Ibidyo natin ang iyong pagtula.

Babasahin ang mga tulang nalathala na sa FB page na 101 Red Poetry for Ka Leody and Walden, at sa kanilang line up. O kung may ambag kang tula na nais mong basahin.

Maghahanda po kami ng puto, kutsinta't malamig na tubig lang po para sa ating poetry reading. Kita-kits!

TULAAN SA MARSO 21

tara't magtulaan tayo

ngayong Marso Bente-Uno

Araw ng Pagtula ito

World Poetry Day sa mundo

tara, bumigkas ng tula

hinggil sa obrero't dukha

hinggil sa danas na sigwa

hinggil sa mga makata

mga paksang samutsari

mutyang may magandang ngiti

at may mapupulang labi

paglutas sa isyu't sanhi

araw na ito'y tandaan

sabay nating ipagdiwang

dito, tayo'y magbigkasan

ng kinatha natin naman

- gregoriovbituinjr.

03.17.2022

Ipanalo ang 2 sa 2022

IPANALO ANG 2 SA 2022

Ka Leody de Guzman, numero dos sa balota

bilang Pangulo ng bansa, ihalal natin siya

at Ka Walden Bello, numero dos din sa balota

bilang Bise-Presidente, iboto natin sila

lalo na't tatlo din ang dos sa taon natin ngayon

twenty-twenty two, taon ng malalaking paghamon

pambáto ng obrero't dukha ang dalawang iyon

upang abutin ang pagbabagong asam pa noon

anila, "Manggagawa Naman sa twenty-twenty two!"

numero dos, Leody de Guzman at Walden Bello

sa Panguluhan at pagka-Bise ay ipanalo

bilang kinatawan sa tuktok ng dukha't obrero

may paninindigang kaiba sa trapong kuhila

may prinsipyong sa mahihirap ay kumakalinga

hustisyang panlipunan ang nilalayon sa madla

para sa kagalingan ng bayan ang inadhika

di nenegosyohin ang serbisyong para sa masa

di tulad ng mga trapong nakasuksok sa bulsa

ng mga bundat na pulitiko't kapitalista

di trapo, di elitista, makamasa talaga

lahat ng suporta'y taas-noo nating ibigay

silang para sa masa, buhay na'y iniaalay

sa halalang darating, ipanalo silang tunay

para sa kinabukasan ng bayan, dangal, buhay

- gregoriovbituinjr.

03.17.2022

Selfie

SELFIE

ako'y agad nakipag-selfie

nang makita siya sa rali

ako'y natuwa't di nagsisi

sa kandidatong nagsisilbi

sa masa't sa kapaligiran

pambatong makakalikasan

kandidato ng mamamayan

ibotong Senador ng bayan

si David D'Angelo siya

pambatong Senador ng masa

na ang partidong nagdadala

ay Partido Lakas ng Masa

matitindi ang talumpati

basura raw ay di umunti

pati klima'y bumubuhawi

magsilbi sa bayan ang mithi

may babalang nakakatakot

hinggil sa klima, kanyang hugot

two degrees ay baka maabot

sa walong taon, anong lungkot

hangga't sistema'y di magbago

habang klima'y pabago-bago

nais ni David D'Angelo

dalhin ang isyu sa Senado

ito'y isyu mang daigdigan

ay dapat lang mapag-usapan

si D'Angelo'y kailangan

at ipanalo sa halalan

- gregoriovbituinjr.

03.17.2022

* selfie ng makatang gala

noong Araw ng Kababaihan

Salin at sipnayan

SALIN AT SIPNAYAN

ang matematika ay sipnayan

ang geometry naman ay sukgisan

set algebra ay palatangkasan

habang algebra ay panandaan

arithmetic naman ay bilnuran

habang ang calculus ay tayahan

istatistika'y palautatan

trigonometriya'y tatsihaan

ang pisika pala ay liknayan

habang ang chemistry ay kapnayan

ang hydraulics ay danumsigwasan

pneumatics ay buhagsigwasan

salin ng integral ay laumin

differential naman ay tingirin

qualitative chemistry'y uriin

quantitative chemistry'y sukatin

ang isakay pala'y monomial

duhakay naman ay binomial

habang talukay ay trinomial

damikay naman ay polynomial

ang sampung sanlibo ay sanlaksa

ang sampung sanlaksa ay sangyuta

ang sangmilyon ay sang-angaw sadya

sampung milyon ay sangkati na nga

sangbahala ang sandaang milyon

sanggatos naman ang isang bilyon

sang-ipaw naman ang isang trilyon

halina't aralin ito ngayon

pagsasalin ng numero't paksa

sa wikang Filipino, pambansa

aralin ng tulad kong makata

nang magamit sa bawat pagtula

- gregoriovbituinjr.

03.16.2022

Labandero

LABANDERO

ako'y labandero sa tahanan

gawain kong sadyang kailangan

dahil may-asawa na'y gampanan

ang gawaing nararapat lamang

mga labada'y iniipon ko

pag may oras, lalabhan na ito

sisimulan sa tabi ng poso

at magkukusot-kusot na ako

batya'y lalagyan ng tubig doon

habang pulbos o baretang sabon

ang aking gagamitin paglaon

sa tshirt, kamiseta, pantalon

gawa'y kusot doon, kusot dito

sa tshirt, kusot-kusot ng kwelyo

ang damit ni misis sa trabaho

mga panty, bra, brief, medyas, sando

babanlawan ng apat na beses

at isasampay ko ng mabilis

mabuti't natutuwa si misis

lalo't pag natuyo'y anong linis

bilang mag-asawa'y pagsisilbi

kay misis kaya minsan ay busy

di lang labhan ang barong sarili

kay misis din, magkatuwang kami

ako'y labandero sa tahanan

buong pamilya'y pagsisilbihan

maglalaba na kung kailangan

upang may masuot sa lakaran

- gregoriovbituinjr.

03.16.2022

Asam nila'y paglaya

ASAM NILA'Y PAGLAYA

kita natin ang maganda nilang nilalayon

"Ipanalo ang paglaya ng kababaihan!"

"Sagipin ang bayan mula sa diskriminasyon

at karahasan!" anong tindi ng panawagan

subalit bakit gayon? dahil ba sila'y api?

mabibigat ang danas, asawa'y nanggugulpi?

second class citizen ba ang tingin sa sarili?

turing ng sistemang patriyarkal sa babae?

"sa karahasan at diskriminasyon, sagipin

ang bayan!" suriin mo't panawagang kaylalim

di ba't sila'y kalahati ng daigdig natin?

tayong sa kanilang sinapupunan nanggaling!

samahan natin sila sa kanilang adhika

upang ipanalo ang asam nilang paglaya

palitan na ang sistemang bulok at kuhila

ng lipunang makatao't bayang manggagawa

- gregoriovbituinjr.

03.16.2022

* litratong kuha ng makatang gala noong Pandaigdigang Araw ng Kababaihan

Pagdalaw sa nayon

PAGDALAW SA NAYON

minsan, dumalaw kami sa nayon

ng maralitang may dalang layon

kami'y nagbigay ng edukasyon

paksa'y karapatan isang hapon

karapatan nila sa pabahay

ay pinag-aralan naming tunay

karapatang pantao'y matibay

na pundasyon ng dangal at buhay

kaya kami nama'y nalulugod

na karapatan ay itaguyod

dukha'y di madulas sa alulod

ng dusa't luhang kapara'y puntod

kundi mabuhay nang may dignidad

may kaginhawahang hinahangad

ang mabuhay nang di nagsasalat

kundi kabuhayan nila'y sapat

iyan din naman ang panawagan

ng kandidato sa panguluhan

at line up ng "Manggagawa Naman"

palitan ang bulok na lipunan

baguhin na ang sistemang bulok

walang trapong sa talino'y bugok

sa bulsa ng bwitre'y nakasuksok

na sistema'y nakasusulasok

masugpo na ang trapo't hunyango

at sistemang bulok na'y maglaho

lipunang makatao'y matayo

sa buong bansa, sa buong mundo

- gregoriovbituinjr.

03.16.2022

Panawagan

PANAWAGAN

asembliya nila'y dinaluhan

panawagan nila'y pinakinggan

dapat nang paigtingan ang laban

sa abotkayang paninirahan

at buhay na may dignidad naman

aba'y napakahalagang sadya

ng panawagan ng mga dukha

abotkayang pabahay sa gitna

ng mga problema, dusa't luha

ito kaya'y kanilang mapala

handa rin sila sa pagtutuos

kaya magagawa nilang lubos

magtagumpay, problema'y matapos

walang aasahang manunubos

kundi ang sama-samang pagkilos

Mabuhay ang Piglas Maralita

alam naming inyong magagawa

anong dapat upang kamting pala

ang inyong mga inaadhika

para sa mga kasapi't madla

- gregoriovbituinjr.

03.15.2022

* litratong kuha ng makatang gala, 02.27.2022

Pakiusap

PAKIUSAP

kaygalang nilang makiusap

bagamat masakit malasap

basahin mo sa isang iglap

tila puso'y hiniwang ganap

pakiusap lang po sa iyo

huwag naman ilagay dito

iyang anumang basura mo

mahiya ka naman, O, ano?

kalinisan o kababuyan?

kalikasan o basurahan?

kapaligiran ba'y tapunan?

anong tingin ng mamamayan?

basura'y saan ilalagay?

o di rin tayo mapalagay?

pakiusap man, lumalatay

sa ating budhi'y lumuluray

kaya ano nang dapat gawin

kundi paligid ay linisin

pagtatapunan ba'y saan din

pag-usapan ninyo't sagutin

- gregoriovbituinjr.

03.15.2022

* litratong kuha ng makatang gala sa isang napuntahang pamayanan

Sahod, Itaas; Presyo, Ibaba

SAHOD, ITAAS; PRESYO, IBABA

sagutan ang mga manggagawa:

"Sahod, Itaas! Presyo, Ibaba!"

sigawang naririnig ng madla

habang sa kalsada'y tumutugpa

kahilingan nila'y makatwiran

sinisigaw ay makatarungan

hiling na mapanuri, palaban

at dumadagundong sa lansangan

kaymahal na ng presyo ng bigas

nagmahal na rin ang presyo ng gas

sa probinsya, presyo ng sardinas

pareho sa N.C.R., ay, gasgas

kaya dapat din, sweldo'y pareho

sa N.C.R. at sa probinsya mo

niloloko na ang probinsyano

ng Regional Wage Board, sadyang tuso

kapitalista'y patatawirin

habang manggagawa'y lulunurin

dapat Regional Wage Board buwagin!

manggagawa'y niloloko lang din

- gregoriovbituinjr.

03.15.2022

* litratong kuha ng makatang gala sa pagkilos sa harapan ng DOLE, 03.14.2022

Tandang

TANDANG

anang tandang: "Mag-uumaga na!"

sa kanyang pagtilaok kanina

madaling araw pa'y ninikat na

si Pebo o Araw sa probinsya

halina't magbubukangliwayway

anong ganda ngayon ang magnilay

dapat kayong kumain ng gulay

nang katawan, lumakas na tunay

at ang mga tao'y nagsibangon

nag-inat, inalam petsa ngayon

nagmumog, naghilamos, naroong

nagluto na ng agahan doon

habang sa kisame pa'y tumitig

muna ang makatang nakiniig

sa diwatang kayganda ng tinig

sinasabayan niya ang himig

lumabas na rin siya sa kwarto

agad na nagmumog, nagsipilyo

nag-almusal, naligo ng todo

naghandang pumasok sa trabaho

ah, maraming salamat sa tandang

sa gawa sa umagang sumilang

sila ang mga hari sa parang

tumitilaok ng buong galang

- gregoriovbituinjr.

03.15.2022

Sa ikatlong Mathematics Day

SA IKATLONG MATHEMATICS DAY

three point one four one five nine two seven pa'y kabisado

subalit ito'y three point one four lang pag ni-round off mo

three point one four, parang ikalabing-apat ng Marso

na pinagbatayan ng Mathematics Day na ito

Maligayang Mathematics Day po sa inyong lahat

halina't magbilang, isa, dalawa, tatlo, apat

lima, sampu, isang angaw, bilang na di masukat

mabuti't may ganitong araw, nakapagmumulat

"Mathematics is Everywhere", tema sa unang taon

"Mathematics for a Better World", ikalawang taon

"Mathematics Unite" naman ang tema ngayong taon

mapanuri, matatalas, tila tayo'y aahon

bahagi ang numero sa ekonomya ng bansa

upang daigdig ay mapaunlad ng manggagawa

sukat na sukat ang tulay at gusaling nalikha

pati ba pagsasamantala'y nasukat ding sadya

pagbibilang ay bahagi na ng buhay na iwi

matematika'y nabubuhay upang manatili

ang daigdig, o marahil kakamtin din ang mithi

kung paano masukat ang guwang, kilo't sandali

Mabuhay ang Mathematics Day, Araw ng Sipnayan!

upang matuto sa pag-inhinyero't kasaysayan

di lamang numero, paglaban din sa kamangmangan

upang tayo'y makaahon mula sa kahirapan

- gregoriovbituinjr.

03.14.2022

* ang nasa litrato'y ilan lang sa aklat ng makata sa kanyang munting aklatan

* 3.14 (March14) 

HAPPY MATHEMATICS DAY!

Maligayang Araw ng Sipnayan sa inyong lahat!

Dagdag sahod

DAGDAG SAHOD

makabuluhang dagdag sahod

ng manggagawa, ipaglaban

makatarungan kung masunod

ang wasto nilang kahilingan

mga manggagawa na'y gipit

sa kakarampot nilang sweldo

kaya kanilang ginigiit

na mapataas naman ito

minimum wage ng manggagawa

suriin mo't kaybabang tunay

lalo sa probinsya sa bansa

kaya dapat sweldo'y magpantay

pambansang minimum na sahod

na sevenhundred fifty pesos

kahilingang tinataguyod

upang pamilya'y makaraos

one thousand six hundred pesos daw

ayon sa NEDA ang living wage

kalahati lang pag pinataw

ay sapat na pang-minimum wage

kapitalista'y tubong limpak

kaya bulsa'y di masasaktan

obrero'y di gapang sa lusak

kung kahilingan ay pagbigyan

manggagawa, magkapitbisig

upang simpleng hiling n'yo'y kamtin

iparinig ang inyong tinig

pamahalaan nawa'y dinggin

- gregoriovbituinjr.

03.14.2022

* litratong kuha ng makatang gala sa pagkilos niyang nilahukan

Ang makata

ANG MAKATA

tinuring mang makatang isang kabig, isang tula

ako'y makata ng lumbay na madla'y di matuwa

dahil sa katotohanang nilalantad kong kusa

yaong nangyayari sa lipunan, kayraming paksa

hinggil sa tunggalian ng kapital at paggawa

hinggil sa labanan ng mga api't mararangya

hinggil sa debate ng mga tutula't tulala

sa pagitan ng mga tutol sa trapo't kuhila

hinggil sa mga kapitalista at manggagawa

hinggil sa pingkian ng kanilang espada't dila

hinggil sa tunggalian ng magkakaibang diwa

o sa labanan ng prinsipyadong obrero't wala

tusong burgesya laban sa mga kaawa-awa

maluluhong elitista laban sa maralita

pagsasamantala sa mga dukhang dapang-dapa

hangga't may hininga pa, ako'y tutula't tutula

tinuring mang makatang isang kabig, isang tula

o kaya'y manunulang isang kahig, isang tuka

di ko na hangad na sa tula ko, madla'y matuwa

mahalaga'y nagsisilbi sa manggagawa't dukha

- gregoriovbituinjr.

03.14.2022

Bakas sa nadaanan

BAKAS SA NADAANAN

doon sa aking nadaanan

ay may bakas ng nakaraan

kayrami bang pinagdaanan

sa mga panahong nagdaan

nais kong humakbang palayo

subalit saan patutungo

ang tulad kong nasisiphayo

ngunit di naman sumusuko

tititig na ba sa kisame

ang tulad kong dumidiskarte

sa pagtula o mga arte

na isang gawaing masiste

lipunang makatao kaya'y

maitayo ng manggagawa

ang taumbayan ba o madla'y

laban sa sistemang kuhila

ah, kayrami kong naiisip

mga katagang di malirip

solusyon kaya'y mahahagip

upang hininga'y di magsikip

buhay ng dukha'y nakalugmok

ang makata'y nakayukayok

kung palitan sistemang bulok

ito kaya ay matatarok

- gregoriovbituinjr.

03.14.2022

Tawilis at kamatis

TAWILIS AT KAMATIS

kaysarap na almusal

kahit walang pandesal

ang ulam ko'y tawilis

at gulay na kamatis

nakapagpapalusog

ang kamatis na hinog

sarap sa pakiramdam

ng tawilis kong ulam

paminsan lang ganito

may tawilis na prito

mula lawa ng Taal

ang isdang inalmusal

kaygandang kombinasyon

ng inulam kong iyon

sana'y mayroon pa rin

bukas kapag nagising

- gregoriovbituinjr.

03.14.2022

Putikang daan

PUTIKANG DAAN

lulusong ka sa putikan

sa araw-araw ba naman

pagkat doon ang tahanan

sa makipot na looban

pader pa'y nakatagilid

ang banta nito'y di lingid

parang pansakal na lubid

nakakapatid ng litid

sila'y iskwater sa turing

bahay ay di nila angkin

pag minsan, walang makain

may pagpag, di gugutumin

iskwater na nalalantad

sa progresong tila huwad

istrukturang pinaunlad

nagniningning ngunit hubad

umunlad ang mga tulay

at gusaling matitibay

di umunlad dukhang buhay

na animo'y nasa hukay

maalikabok ang daan

lalo't araw, kainitan

dahil kagabi'y umulan

ay nagputik ang lansangan

nasaan na ang pag-unlad

kung putik ang nilalakad

dukha'y ginhawa ang hangad

ngunit sa hirap ay babad

ang daan man ay maputik

kung masa'y magkapitbisig

kung karapatan ay giit

kakamtin din yaong langit

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Makipot sa looban

MAKIPOT SA LOOBAN

napakakipot ng daan

sa pinuntahang looban

mga dukha'y tinitirhan

ang lupang di ari't yaman

baka mapalayas sila

sa lupang di pa kanila

nagpapatulong ang masa

sa pananahanan nila

bahay nila'y dikit-dikit

barongbarong, maliliit

pag apoy ay pinarikit

sunog na sa isang saglit

bakit sistema'y ganito

ang tanong nila't tanong ko

silang mamamayan dito

ay iskwater sa bayan ko

araw-gabi, kumakahig

nagugutom, inuusig

silang mga walang tinig

ay dapat magkapitbisig

ganyang buhay sa looban

hirap din ang kalooban

ang kaginhawahang asam

ay kailan makakamtan

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Panawagang pangkalusugan

PANAWAGANG PANGKALUSUGAN

mahalagang pundasyon ng mga kababaihan

ang ipaglaban ang kalusugan ng mamamayan

namnamin lamang natin ang kanilang panawagan

nang pinaglalaban nila'y ating maunawaan:

"Pandemya sa kalusuga't kahirapan, wakasan!"

"Universal Health Care ay ipatupad at pondohan!"

panawagang mapagpalaya sa kababaihan

hiling nilang dapat tugunan ng pamahalaan

na kung si Ka Walden Bello na ating kandidato

ay maipanalo't mauupong Bise Pangulo

panawagan ng kababaihan ay sigurado

matutupad ang makatarungang hiling na ito

kaya sa kalusugan ng bayan, kasangga natin

sina Ka Leody de Guzman, lalo si Ka Walden

kaya patuloy nating isulong ang adhikain

sa kalusugan ng sambayanan, ating mithiin

- gregoriovbituinjr.

03.13.2022

* litratong kuha ng makatang gala sa rali noong Araw ng mga Kababaihan    

Almusal

ALMUSAL

tara, tayo nang mag-almusal, simpleng agahan lang

lalo't madaling araw ay nagutom at nagising

bumangon, hilamos, nagsaing, nagluto ng ulam

may kamatis, sibuyas, mayroon pang pritong daing

sa pagkahimbing ko'y sinundan pala ng diwata

na nang mapalapit sa akin, amoy ko ang bango

tila baga puso ko'y nabihag, di masawata

sa pagsinta sa diwatang sumuyo sa puso ko

hanggang maalimpungatan at mata'y iminulat

sa katotohanang wala ang diwata sa tabi

nagutom lang ako sa pamamasyal naming sukat

sa panagimpan habang diwata'y minuni-muni

ah, makakain na nga ng masarap na almusal

at idighay na lamang ang nangyaring panaginip

ayos na ang pritong daing kahit walang pandesal

nakabubusog na rin, anuman ang nalilirip

- gregoriovbituinjr.

03.13.2022

Hatinggabi na

HATINGGABI NA

hatinggabi na, dapat matulog

lalo't isip na'y kakalog-kalog

subalit mag-ingat pagkat busog

baka bangungutin, maging itlog

hatinggabi na, nagninilay pa

di makatulog, nag-aalala

anong dami ng isyu't problema

ng bansa't naorganisang masa

hatinggabi na, ika'y umidlip

baka may magandang panaginip

solusyon sa problema'y malirip

at pagkagising, may masasagip

hatinggabi na, tulog na tayo

sa munti nating banig, mahal ko

nang makagising ng alas-singko

maagang mamamalengke ako

sinalubong ko ang hatinggabi

na sa pagmamahal ay sakbibi

at sa aking sinta'y nagsisilbi

sa mutya kong kabigha-bighani

- gregoriovbituinjr.

03.12.2022

Ka Leody para sa Climate Justice

KA LEODY PARA SA CLIMATE JUSTICE

pambato natin sa panguluhan

Ka Leody de Guzman ang ngalan

manggagawa, makakalikasan

may prinsipyo, may paninindigan

sa Climate Walk, siya'y nakiisa

ako'y saksi nang siya'y sumama

sa unang araw d'un sa Luneta

santaon matapos ang Yolanda

Climate Justice ay kanyang unawa

bilang isang lider-manggagawa

pinaliliwanag niyang sadya

kalagayan ng klima sa madla

ako ang kanilang kinatawan

sa Climate Walk, mahabang lakaran

mula Luneta hanggang Tacloban

kinaya rin, nakatapos naman

Ka Leody'y ayaw ng Just-Tiis

ang kanyang adhika'y Climate Justice

climate emergency'y bigyang hugis

nang serbisyo sa tao'y bumilis

sa Climate Justice, ating pambato

si Ka Leody para pangulo

kung nais natin ng pagbabago

Manggagawa Naman ang iboto

- gregoriovbituinjr.

03.12.2022

Pabahay para sa maralita

PABAHAY PARA SA MARALITA

"Pulitika ng mamamayan, hindi ng iilan!"

makahulugang pagbabagong dapat makagisnan

na sa panahong ito'y panawagang makatwiran

pagbabago ng sistema'y ating ipagsigawan

pagkat ang pulitika'y di lamang para sa trapo

na ang serbisyo publiko'y ginagawang negosyo

ang pag-aaring publiko'y ginagawang pribado

kaya lalo nang naghihirap ang dukha't obrero

kaya sa halalang ito'y dapat may magbago na

pagkat di na ubra iyang sistema ng burgesya

na magserbisyo sa tao'y utak-kapitalista

na halos buong bansa na ang gustong maibenta

"Bagong Botante, Bagong Pulitika!" itong nais

ng mamamayan laban sa mga mapagmalabis

sa kapangyarihan, habang ang madla'y nagtitiis

sa mga tusong trapo, bagang nila'y nagtatagis

"Pabahay para sa maralita," laging pangako

ng mga pulitikong kundi balimbing, hunyango

tuwing kampanyahan, subalit kapag nakaupo

kanilang pangako sa maralita'y napapako

"Pulitika ng mamamayan, hindi ng iilan!"

iguhit na natin ngayon ang bagong kasaysayan

isang kauri natin si Ka Leody de Guzman

na dapat nating maipanalo sa panguluhan

upang mapatupad ang kaytagal nating pangarap

sapat at abotkayang pabahay sa mahihirap

pag si Ka Leody'y manalo't maupo nang ganap

ay mapatupad ito sa dukhang dapat malingap

- gregoriovbituinjr.

03.12.2022

* litratong kuha ng makatang gala noong Women's Day

P750 minimum wage para sa lahat

P750 MINIMUM WAGE PARA SA LAHAT

minimum na sweldong pitongdaan limampung piso

sa buong bansa para sa ating kapwa obrero

plataporma ito ng ating mga kandidato

kayganda, na siyang ipatutupad pag nanalo

di gaya ngayon, Regional Wage Board umiiral pa

kaya iba ang sahod ng obrero sa probinsya

sa N.C.R. nga, five hundred thirty seven pesos na

habang three hundred pesos lang doon sa Cordillera

apatnaraan dal'wampung piso sa Gitnang Luzon

at apatnaraang piso naman sa CALABARZON

sa MIMAROPA, three hundred twenty pesos lang doon

sa Bicol, kaybaba, three hundred ten pesos lang iyon

mas mataas sa BARMM kaysa Bicol ng kinse pesos

parang Eastern Visayas, three hundred twenty five pesos

sa Western Visayas ay three hundred ninety five pesos

sa rehiyon ng Davao, three hundred ninety six pesos

gayong halos pare-pareho ang presyo ng bigas

sa lahat ng rehiyon, kahit presyo ng sardinas

bakit sweldo'y magkaiba pa, dapat iparehas

ganito ang nais natin, isang lipunang patas

gayong sa loob ng pagawaan, sahod at tubo

ang pinagbatayan, di dahil lugar ay malayo

kaya pag ating pambato'y manalo, napipinto

na ang Regional Wage Board ay tuluyan nang maglaho

pantay-pantay na sweldo sa lahat ng manggagawa

di pa living wage ang pinag-uusapan ng madla

seven hundred fifty pesos minimum wage sa bansa

ito'y makatarungan lang, obrero'y guminhawa

- gregoriovbituinjr.

03.12.2022

Pinaghalawan ng datos:

https://nwpc.dole.gov.ph/?s=provincial+minimum+wage

https://nwpc.dole.gov.ph/regionandwages/national-capital-region/

https://allthebestloans.com/blog/minimum-wage-in-the-philippines

Ang panawagang "Go for Green. Go for Real Zero Emission."

ANG PANAWAGANG "GO FOR GREEN. GO FOR REAL ZERO EMISSIONS."

sa t-shirt may tatak: "Go for Green.

Go for Real Zero Emissions." din

matay ko man anong isipin

ngunit pagninilay-nilayin

hinggil sa buong daigdigan

hinggil sa ating kalikasan

mga asap sa kalangitan

ang usok sa kapaligiran

kaya dapat walang polusyon

dapat sero na ang emisyon

walang usok, wala na iyon

dahil walang coal plants na ngayon

sa mundo'y di na nagsusunog

niyang fossil fuel, ng dapog

panawagang ito'y matunog

pagkat isyung ito'y nabantog

ngunit di pa rin mapigilan

negosyo kasing malakihan

limpak-limpak kung pagtubuan

ng kapitalistang gahaman

anong dapat nating magawa

sa sistema nilang kuhila

paano nga ba mawawala

zero emission ay kamting sadya

- gregoriovbituinjr.

03.11.2022

* litratong kuha ng makatang gala sa isang public forum na nadaluhan

Hustisya sa Klima, Ngayon Na!

HUSTISYA SA KLIMA, NGAYON NA

dinig ko ang talumpati ni David D'Angelo

talagang mapapaisip ka kapag ninamnam mo

lalo't sinabi ang pag-iinit ng klima, mundo

na sa loob ng walong taon, lalala pa ito

habol natin, huwag umabot ng 1.5 degree

ang pag-iinit ng mundo, ngunit kanyang snabi

doon sa nilahukang rali, ito pa'y titindi

baka sa walong taon, abot na'y dalawang degri

nakababahala ang nangyayari sa daigdig

habang ang bansang Ukraine ay pilit na nilulupig

dahil daw sa fossil fuel, gerang nakanginginig

sa nangyayaring climate change pa'y anong dapat tindig

si D'Angelo, sa Senado'y kandidato natin

sa kanyang talumpati ay sinabi nang mariin

pagsusunog ng fossil fuel ay dapat pigilin

pagpapatakbo ng coal plants ay dapat sawatain

subalit mga iyon ay pagbabakasakali

makapangyarihang bansa'y gagawin ang mungkahi?

malaking katanungan, di iyon gayon kadali

dapat ngang mag-organisa para sa ating mithi

dapat Annex 1 countries ay pagbayarang totoo

ang nangyayari sa lahat ng bansang apektado

karaniwang mamamayan ay kumilos ding todo

upang mapigilan na ang nagaganap na ito

asam nating itayo ang makataong lipunan

na walang sinusunog na fossil fuel o coal plants

kung saan pantay, walang mahirap, walang mayaman

may karapatang pantao't hustisyang panlipunan

- gregoriovbituinjr.

03.11.2022

* litratong kuha ng makatang gala noong Women's Day

Ang planong aklat na "101 RED POETRY para kina Ka Leody, Walden at sa kanilang line-up"

ANG PLANONG AKLAT NA "101 RED POETRY PARA KINA KA LEODY, WALDEN AT SA KANILANG LINE-UP"

Maikling sanaysay ni Gregorio V. Bituin Jr.

Isang pambihirang pagkakataon ang ibinigay ng kasaysayan kina Ka Leody De Guzman na tumatakbong pangulo ng bansa, Propesor Walden Bello para sa pagkabise-presidente, Atty. Luke Espiritu, Roy Cabonegro at David D'Angelo bilang mga senador, at sa ating PLM (Partido Lakas ng Masa) partylist.

Pambihirang pagkakataon din ito upang muling maging aktibo ang inyong lingkod na kumatha ng tula at payabungin ang tinatawag na panitikang proletaryo o panitikan ng uring manggagawa. Ika nga noon ng guro kong si Rio Alma sa aking mga tula ay pulos daw social realism. Ibig sabihin, pagkatha ng tula batay sa reyalidad ng nangyayari sa lipunan. Ibig sabihin din, kaiba sa kanilang panukalang Modernismo sa pagtula.

Pambihirang pagkakataon din ito sa tulad kong makatang maglulupa na makapaglathala ng aklat na "101 RED POETRY para kina Ka Leody at Walden at sa kanilang line-up" lalo na't naunang naglabas ng aklat na "100 Pink Poems para kay Leni" ang animnapu't pitong (67) kilalang makata sa bansa, sa pangunguna ng makatang Rio Alma, na pambansang alagad ng sining o National Artist sa ating bansa.

Subalit ang inilalabas nating aklat na "101 Red Poetry..." ay hindi bunsod ng inggit dahil nakapaglabas sila ng mga tula para kay Leni Robredo na ikinakampanya nilang pangulo. Hindi lang ito bunsod na dapat kong ikampanya ang aking ninong sa kasal na si Ka Leody De Guzman bilang pangulo, at ang buo niyang line-up. Higit sa lahat, ito'y bunsod ng tungkulin ko bilang makata na gisingin, ibangon, at payabungin pa ang tila naghihingalong panitikang proletaryo sa bansa. 

Ito'y bunsod din ng tungkulin ko bilang makatang aktibista na ipaunawa ang tunggalian ng uri sa masang Pilipino laban sa mga tula ng mga elitistang nasa toreng garing. Ito'y panitikan mula sa ibaba, mula sa putikan ng iskwater, mula sa pagawaan ng mga unyonistang nakawelga, mula sa kababaihang nakikibaka, mula sa mga maralitang dinedemolis ang kanilang mga tahanan, mula sa kabataang nais ng mas maayos at dekalidad na edukasyon, mula sa mga magsasakang nagpapakain sa buong lipunan subalit nananatiling mahirap, mula sa mga vendor na nagsisikap maghanapbuhay ng marangal subalit pinagbabawalang magtinda, na madalas ay hinuhuli ng mga pulis o nakikipaghabulan pa sa mga taong gobyerno, mula sa mga inosenteng taong biktima ng extrajudicial killings sa bansa, mula sa piitan ng mga bilanggong pulitikal, mula sa panawagang karapatang pantao at hustisyang panlipunan. Ah, napakaraming api at pinagsasamantalahan sa lipunan, at kulang ang 101 tula upang ilarawan, ikwento at itula lahat sila.

Working-in-progress pa ang mga kathang tulang ito na sinimulan lamang noong Marso 1, 2022, at balak matapos at malathala na sa mismong Mayo 1, 2022, Pandaigdigang Araw ng Manggagawa. At dahil nais nating maabot ang gayong bilang ay aktibo tayong tula ng tula sa bawat araw. Kaya noong Marso 1, 2022 ay nalikha na ang facebook page na 101 Red Poetry for Ka Leody and Walden, bagamat Ingles ay nasa wikang Filipino ang mga tula.

Subalit bakit 101 imbes na 100, tulad ng libro ng mga makata para kay Leni? Una, dahil bihira sa mga manunulang kabilang sa 101 ang talagang tumutula. Marahil ako lamang. Nakapagpasa sa akin si Ka Tek Orfilla, Bise Presidente ng Kongreso ng Pagkakaisa ng Maralitang Lungsod (KPML), kung saan ako ang sekretaryo heneral, ng dalawang pahinang may labing-isang (11) tula hinggil sa pagtakbo nina Ka Leody, na nais kong isama sa 101. Ikalawa, ang 101 ay kadalasang inilalakip sa mga subject sa kolehiyo bilang pundamental o pangunahing pag-aaral hinggil sa isang paksa. Halimbawa, Rizal 101, Human Rights 101, Sociology 101, at iba pa. Ibig sabihin, para sa mga bagito pa sa kolehiyo, o bagito pa sa paksang iyon. Tulad ng ilang kilala kong aktibista't maralita na bihirang sumusulat ng tula datapwat paminsan-minsan ay nakakapagsulat ng tula.

Subalit bakit Red Poetry? Dahil ba Pink Poems ang inilathala para kay Leni? Marahil nga, labanan din ito ng mga kulay. Kulay pula bilang tindig ng mga manggagawa. Kulay pula dahil pag lumabas ang mga manggagawa at lumahok sa pagkilos tuwing Mayo Uno, lahat sila o mayorya sa kanila ang nakapula. Ang pula ay kulay ng kagitingan, kulay ng pakikibaka ng ating mga bayani. Kulay ng katapangan na kahit masugatan ay hindi susuko. Kulay ng manggagawa. Ang pink ay malabnaw na pula o may halong dilaw kaya lumabnaw.

Kaya ang paglalathala ng 101 Red Poetry ay isang pagkakataon upang ilathala ang tula ng mga nasa ibaba, mga marginalized o sagigilid o nasa laylayan ng lipunan. Kung nais mong makibahagi sa proyektong ito, inaanyayahan kitang ilathala mo sa iyong fb account ang iyong tula, at kung mamarapatin mo, at bilang editor ng page at ng lalabas na aklat, ay karapatan kong ilathala iyon kung naaayon at di mapanira sa ating mga kandidato. 

Ang maglalathala ng aklat ay ang Aklatang Obrero Publishing Collective na aking pinamamahalaan simula pa noong taon 2007. Nakapaglathala na ito ng maraming aklat ng tula, at mga aklat ng kasaysayan hinggil kina Macario Sakay, Andres Bonifacio, Emilio Jacinto, Che Guevara, Ka Popoy Lagman, at Lean Alejandro. Ang disenyo ng pabalat ng aklat sa sanaysay na ito ay draft o borador pa lamang. Maaari pa itong mapaunlad. Subalit gustong-gusto ko ang litrato ng dyip na may poster nina Ka Leody, dahil sumisimbolo ito ng karaniwang taong ipinaglalaban nina Ka Leody, Ka Walden at ng kanilang line-up.

May plano rin tayong tulaan ng Red Poetry o Pulang Tula sa mga sumusunod na araw: Marso 21 - World Poetry Day; Abril 2 - Balagtas Day, na magandang ilunsad sa plasa kung saan may rebulto ang makatang Francisco Balagtas sa Pandacan, Maynila; at sa hapon o gabi ng Mayo Uno 2022 matapos ang rali ng mga manggagawa.

Tara, magtulaan na tayo, at magpasa na kayo ng tula para sa 101 Red Poetry para kina Ka Leody, Walden, at sa kanilang line-up.

Sinulat sa opisina ng manggagawa sa Lungsod ng Pasig

Marso 11, 2022

Panawagan ng kilusang ORIANG

PANAWAGAN NG KILUSANG ORIANG

"Ipanalo ang paglaya ng kababaihan!"

at "Sagipin ang bayan mula sa kahirapan!"

dinggin ang mariing hiyaw ng kilusang ORIANG

at damhin ang katapatan ng paninindigan

silang mga babae'y di dapat binabastos

Safety Spaces Act, VAWC Act, alaming lubos

di dapat mga buhay nila'y kalunos-lunos

dahil sa hirap na dulot ng pambubusabos

sinumang babae'y larawan ng ating ina

lalo't tayo'y mula sa sinapupunan nila

ika nga, kung kaya ng lalaki, kaya nila

ngunit kanilang sweldo'y di patas sa pabrika

double burden, dobleng pasanin ang maririnig

sa mga babaeng tila nawalan ng tinig

paano lalaya, dinggin ang kanilang tindig

unawain silang kalahati ng daigdig

ang panawagan ng Oriang ay dapat malirip

paano bang bayan sa kahirapan masagip

ang paninindigan nila'y walang kahulilip

kundi paglaya nilang sa puso halukipkip

- gregoriovbituinjr.

03.11.2022

* litratong kuha ng makatang gala noong Women's Day

Sa pag-ihi

SA PAG-IHI

bakit ka iihi sa kalsada

lalo sa kahabaan ng EDSA

aba'y di mo na talaga kaya?

at nasa pantog mo'y lalabas na?

pinaskil: "Bawal Umihi Dito"

nilagay sa daanan ng tao

huwag umihi saan mo gusto

ito'y paalala namang wasto

pag namultahan, aba'y magastos

kaya paskil ay sundin mong lubos

parang sinabing "Huwag kang bastos"

sa trapong laos, dapat makutos

sa magkabila'y huwag umihi

pantog man ay nanggagalaiti

humanap ng C.R., magmadali

lagi nating habaan ang pisi

kaya ihi'y talagang tiisin

kaysa naman tayo'y pagmultahin

ng kung sinong nais kumita rin

kaya saan may C.R., alamin

halina't umihi lang sa tama

nang di maabala ng kuhila

o buwitreng animo'y tumama

sa lotto pag multahan kang bigla

- gregoriovbituinjr.

03.10.2022

* litratong kuha ng makatang gala sa isang bangketa sa EDSA

Salot na kontraktwalisasyon ay iskemang linta

SALOT NA KONTRAKTWALISASYON AY ISKEMANG LINTA

tunay na salot sa manggagawa

ang kontraktwalisasyong malubha

walang seguridad sa paggawa

benepisyo ng obrero'y wala

kontrata'y apat o limang buwan

di paabuting anim na buwan

sa kapitalista nga'y paraang

di maregular sa pagawaan

kontraktwalisasyon ay iskemang

inimbento ng kapitalista

manpower agencies, likha nila

upang magsamantala talaga

upang karapatan sa paggawa

ay maikutan nila't madaya

iskema itong kasumpa-sumpa

para sa tubo, iskemang linta

dugo't pawis ng obrero'y dilig

sa pagawaan, sakal sa leeg

obrero, kayo'y magkapitbisig

upang iskemang ito'y malupig

laway lang ang puhunan, pera na

manpower agencies ay kaysaya

walang gawa, bundat pa ang bulsa

lintang tunay sa sahod ng masa

durugin ang kontraktwalisasyon

wasakin na ang salot na iyon

sa manggagawa, ito ang misyon

kung nais na sila'y makaahon

kaya manggagawang kandidato

natin sa halalan ay iboto

pag sila'y ating naipanalo

salot ay bubuwaging totoo

- gregoriovbituinjr.

03.10.2022        

Di kapayapaan ng libingan

DI KAPAYAPAAN NG LIBINGAN

aking nais na kapayapaan

yaong may hustisyang panlipunan

di katahimikan ng libingan

kundi payapang makatarungan

ayokong kaya ka nanahimik

upang di lang marinig ang hibik

gayong loob ay naghihimagsik

sa inhustisyang sa puso'y tinik

tumahimik lang dahil sa takot

katahimikang pulos bangungot

pagkat karapatan ay nilagot

ng mga trapo't burgesyang buktot

kapayapaang dapat malinaw

sa puso, isipan, diwa, ikaw

hustisyang panlipunan ay litaw

ang karapatang pantao'y tanaw

kaya kapayapaang ayoko

ay yaong kagaya'y sementeryo

na di kapayapaang totoo

kundi bunsod ng mga abuso

yaong nais kong kapayapaan

ay ang may hustisyang panlipunan

di katahimikan ng libingan

kundi payapang makatarungan

- gregoriovbituinjr.

03.09.2022