HIMBING NA KUTING SA MADALING ARAW
madaling araw ay sinilip ko ang limang kuting
na para bang ang aking alaga'y mga tsikiting
naroon sila, kumpleto pa rin, himbing na himbing
habang ako rito'y nagninilay, gising na gising
at nakatunganga na naman sa harap ng papel
nagninilay bakit patuloy pa ang fossil fuel
o kaya'y katiwalian ng mga nasa poder
pag natapos na'y agad ititipa sa kompyuter
mabuti nga't may alagang kuting na natatanaw
himbing na himbing pa sila ngayong madaling araw
pag pumutok na ang araw sila'y magsisingiyaw
ano kayang ipakakain kong luto o hilaw?
sila'y talaga kong pinagmasdan bago magsulat
sa diwa'y may paksa na namang makapagmumulat
- gregoriovbituinjr.
05.04.2023
Walang komento:
Mag-post ng isang Komento