Sa ngalan ng tulâ

SA NGALAN NG TULA

sa ngalan ng tulâ, / dangal ko't layunin

kumatha't kumathâ, / tula'y bibigkasin

marangal na atas / ng diwa't damdamin

para sa daigdig, / masa't bayan natin

sa ngalan ng tulâ, / balita't nanilay

sa maraming isyu / ng dalitang tunay

ay dapat ilantad, / bawat tula'y alay

sa bayan sapagkat / tula'y aking tulay

sa ngalan ng tulâ, / hangad kong lipunan

ay patas, parehas / at makatarungan

bulok na sistema'y / tuluyang palitan

hanggang makataong / lipuna'y makamtan

sa ngalan ng tulâ, / makatulong sadyâ

nang hustisya'y kamtin / ng bayan, ng madlâ

at mapanagot na / ang mga kuhilà,

tiwali't gahaman / sa kaban ng bansâ

- gregoriovbituinjr.

09.15.2025